Chornada d'Aizión Global contra la Expo, combocada por a Plataforma Expo No, arrocló a zientos de personas en diferéns actos contra o macroebento, debán de l'esluzerne de buena parti d'a ziudadanalla, o refirme y simpatía d'atra y un, nos pensamos, chicot refuse d'atra parti que esfenden a muestra en un tono más propio de “hooligans” que de suposaus esfensors d'o desembolique sostenible que trata o festibal de l'augua en Ranillas. Prenzipió a chornada con l'enguero d'a Quincena Europea Zapatista, una ripa d'actos que ban a fer-sen por tot lo continén y cuyo pistoletazo de surtida estió lo zaragozano parque Bruil con una charrada d'o Centro de Documentación Zapatista, CEDOZ.

Se fazió consonar a charrada con o Día de México en la Expo, por a presenzia antimás d'o presidén mexicano Felipe Calderón y o Gobernador de Chiapas, una d'as redoladas más azuzadas por o chantache a las comunidaz zapatistas meyán a militarización d'un recurso alazetal como ye l'augua.

A charrada-foro ubierto d'a tardi correspondió a la situgazión d'expolio de l'augua por parti de l'estau d'Israel en a situgazión d'Orién Meyo, más que más d'a grau situgazión d'a poblazión palestina. A enchaquia d'ista charrada estió l'enguero d'a muestra por parti d'a Filarmonica d'Israel, con o politicamén correcto Zubin Mehta de director, en una mega chugada por parti d'a organizazión d'Expoagua.

A las 20 oras zientos de personas empezipión a arroclar-sen en a Pza España, punto de surtida d'a manifestazión, que teneba por lema "Expo No, un derroche insostenible"

Si fa u no fa a las 20,30 una milenta personas surtiban enta la zentrica carrera Coso zaragozana. Dentre os asisténs chen plegada de zentros sozials de Barzelona y de Solidarios con Itoitz. Pancartas remerando-sen d'a represión contra os indios mapuche en Chile y Archentina a os que se furta la suya augua y as suyas tierras tradizionals, un remero a la criminal actuazión de l'entibo d'Itoitz, octabillas y pancartas solidarias con o pueblo palestino, con Chiapas, donzainers, siñals royinegros…

Prou que sí un bestial despliegue polizial en una ziudat prenida por milentas de fatos d'azul y secretas indiscretos, encara que en tot inte mantenión una prudén distanzia, fueras de bellas identificazions antis d'a manifestazión.

Tamién refitolera de tot a presenzia mediatica. Reporters d'una TV australiana, d'a Republicca de Milán y de bels meyos internazionals que cubren a muestra y so que una periodista d'un meyo local, que han amagau de traza bergoñosa cualsiquier oposizión a la muestra.

Mientres a manifestazión chilos y canticos como "Expo No", "Expo pa los ricos deuda pa los pobres", "el pufo de la Expo ¿Quién lo pagará?" Y atros de conteniu bistero y mesmo surrealista como "voluntarios gilipollas"

O recorriu, encara que no guaire cutiano en as manis zaragozanas, contó con asabelo publico, esnabesando a Madalena, do abió aplausos y rematando en o Puén de Fierro u Puén d'o Pilar, do se leyón os manifiestos en una polida tardada sobre un río Ebro d'o que muitos quieren apropiar-sen y fer esquimens.

En l'empezipie d'os tiempos (isto ye, dentre o 2005 y o 2006), lo que agora se conoix como Gran Scala se clamaba prochecto Los Monegros. Biel y Aliaga encara no s'eban feito ixes con o tema. Os promotors de l'esbergoñau imbento sisquiá podeban nian soniar con o ran de complizidat instituzional d'o que disfrutan actualmén.

O prochecto Los Monegros estió l'imbento d'uns personaches de mal clasificar (...)

Ta Paul Stephan Allegrini y Christian Colus, dos d'os suyos actuals zelebros, Gran Scala representa la continazión lochica (dende a suya ambista) de Goldenpot, un casino birtual y global que no pas funzionó que en Bolibia y cuala zentral estió clabada en Barzelona dica que plegón as emparas.

Gran Scala, como o suyo nombre indica, corre muito más luén y buela muito más altero que no ixe Goldenpot (...)

Allegrini y Colus, Riera y Carreras, Muniesa y Espadalé... o senador d'o PAR José María Mur. Toz ellos, chuntos encara que no esbarachaus, estioron madurando una proposa cuala patén orichinal reclama Muniesa ta él. Pero estioron os cuatro primers (dos franzeses y dos catalans) qui han rematau adugando una operazión que siempre sembló esmesurada y quimerica, y agora perbibe de malas trazas en o preto de prous rebelazións xorrontaderas, agafada nomás que ta la zerrina boluntat d'o suyo gran esfensor politico (sacau Mur d'o reparto): o bizepresidén d'o Gubierno aragonés y presidén d'o PAR, José Ángel Biel, o mesmo ombre que istos diyas, cuán se fa publico lo que i hai dezaga de l'empandullo, demanda explicazions t'os demás en cuentas de dar-las él, como estaría lo lochico.

Goldenpot teneba una mannifica siede (logada) en o World Trade Center (WTC) de Barzelona, una tecnolochía informatica suposadamén puntera, una bocazión globalizadera traduzida en prous sucursals d'as cualas so que una (a bolibiana) plegó a funzionar. Pero lo más importán yera o modus operandi: una soziedat de capital minimo manullada por Christian Colus, dezaga d'a cual existiba unatra soziedat luxemburguesa dende la que actuaba Paul Stephan Allegrini. Dezaga d'ista pantalla iba a creyar-se un complexo sozietario más embolicau ta mober esquimens y royalties lo más luén posible d'o fisco.

Si bi'n abió d'esquimens y imbersións reyals, nunca no se sabió. Cuán prenzipión a plegar os acreyedors no i quedaban que os muebles y una cuenta bueda en a ofizina d'o Banco de Sabadell clabada en o mesmo WTC. Yera l'añada 2005 cuán Allegrini y Colus se'n fuón ta Franzia (...)

Parix que Arturo Aliaga, o consellero d'Industria, Comerzio y Turismo d'a DGA, se dixó esluzernar y o suyo chefe dreito, o bizepresidén d'o Gubierno aragonés, José Ángel Biel, lo beyó muito platero: prochectar una neoziudat de l'ozio en a estepa monegrina podeba tornar-se en una oportunidat d'oro. Más que más si a ideya contaba con o firme refirme d'o Pignatelli (...)

¿Por qué os promotors d'o que agora dezimos Gran Scala no pillón antis os sulers? Por dos razons plateras: porque creyeban con mui buenas razóns a posibilidat de recullir os sulers de baldes (mesmo en istos intes l'Heraldo parla d'allenazións en L'Almolda); u bien porque cuán prebón de siñalar terrenos en Los Monegros (bi'n ha en grans fincas de buen mercar y de bez) se i trobón con propietarios que demandaban guaranzias en efectibo. Y ixo...

Allegrini le furta o negozio a Muniesa. Biel le'n arrebata a Mur. Iglesias no sabe d'an le plega l'uracán y, si lo sabe, se fa o mondiu. El resultau, a la fin, ye un laberinto abonau en Aragón por os puestos comúns y por un refirme gubernamental que amaga la berdat: que os suposadamén famosos promotors de Gran Scala no son que un empandullo d'interpresas de meyas midas en o sector de l'ozio adulto y, más que más, que a mayoría d'as partizipazións en International Leisure Development (ILD) corresponden a soziedaz instrumentals domiziliadas en paradisos fiscals, y belunas más pacas y blindadas que no una caxa fuerte (...)

Os interrogáns han puyau y prou en os zaguers diyas. No sabemos si somos debán d'una ideya u d'un prochecto. Pero sí podemos beyer esclatero que aquí, en cuentas de grans interpresas solbéns, abundan as soziedaz de chiki-chiki (...)

Existen antimás alazetadas indizias de que dezaga de tot isto se troba o comisionista internazional André Guelfi (embotau Dedé la Sardine). I hai fantasticas falordias d'as trazas en que a o consellero d'Industria, Arturo Aliaga, le fazión ixes en continas reunións clabadas en luxosas redoladas. Se superponen as dudas en o tocán a la solbenzia finanziera d'os promotors d'o prochecto-ideya. Ha amanexiu, igual como si estase una chanada, l'efecto colateral d'o motor fantastico que os portabozes d'ILD preban de ficar-le a o Gubierno d'Aragón. En ista operazión paralela a Gran Scala s'ha feito serbir o logotipo d'a DGA. ¿Belún en da más?

Faunisticamen, l'ambito d'o parque natural cuenta con una gran riqueza en cuanto a dibersidat d'espezies y a la suya importancia ecolochica, y dende un punto de bista floristico, esisten dos zonas calificadas como claus d'intres botanico, con una alta dibersidat floristica: os mazizos de Peña Forca, Petraficha y a Mesa d'os Tres Reis constituyen o primer d'ellos. O segundo, se situga en os mazizos d'Aspe y Bisaurín, plegando dica o mazizo de Collarada. Destacan os pastos alpinos y subalpinos, por albergar a mayor parti d'as plantas consideradas rarizas, asinas como gran parti d'os endemismos pirinencos localizaus dentro d'o Parque.

D'a mesma traza, cal destacar as masas forestals, por o suyo gran balor biolochico, de nasarro, fau y abete.

A foca anillada d'o Baltico (Pusa hispida botnica), espezie protechida y en periglo d'extinzión, cría a os suyos bebés en espelungas de nieu y chelo dimpués d'a naxedura d'istos, que se produz entre chinero, febrero y marzo. Cuan as crías han enzebiau prou como ta tener una gruesa capa de grasa que as protecha, salen a las cheladas aiguas d'o Baltico.

Pero a influenzia d'o ser uman en o cambeo climatico ha afeutau a o suyo ziclo de reproduzión, con un d'os ibiernos más calidos y menos chelaus d'os zaguers 300 años en a rechión. "Como o deschelo se produz prou rapedo, as crías se beyen abocadas a dentrar en l'aigua mas luego d'o normal", sin conseguir acumular a grasa amenistada ta que as protecha, por o que "mueren de fambre y fredor".

En un comunicau, a Coordinadora Ecolochista d'Asturias esplanica que a dilazión -entre zinco y diez años- en l'aparixión d'a enfermedat dende a exposizión a las partíclas que emiten istas plantas podría sinnificar a existenzia d'un numero superior de casos de cánzer respeuto a os que han estau dianosticaus en a zona.

L'estudio franzés determina, por ixample, que o riesgo de padezer cánzer en as frixelinas blandas ye un 22 por zien superior en as personas que biben aman d'una planta cremadera, seguiu por o de feche, con un 16 por zien más de riesgo, y o de mama, en as mullers, con un 9 por zien más de periglo.

¿Creyes que a DChA abría d'introduzir mas onsos n'o Pirineu?

En Fendo Orella queremos saber que piensan os aragonesofablans sobre iste tema, ta ixo, feremos un programa espezial en o que charraremos d'os onsos en l'ecosistema pirinenco y contimpararemos a suya situazion con a d'os suyos, cada bez mas lexanos, parientes d'a cordillera cantabrica.

Escribe-nos dando a tuya opinion sobre os onsos, u dizindo-nos tot lo que sepas sobre ellos a fendo.orella(a)gmail.com, u simplamen dixa un comentario en ista notizia.

Os onsos, luego en Fendo Orella. Quere-mos saber a tuya opinion!!

Debán de l'anunzio d'a posible ubicazión en Aragón d'almazens subterraneos de CO2, an que se ficarían os gases beniéns de grans industrias con l'ochetibo suposau de luitar contra o cambeo climatico, Ecolochistas en Aizión considera menester fer publicas as beniens reflexions:
1. Ecolochistas en Aizión considera que ye urchén de tot, igual como refirman os informes d'a Colla Intergubernamental d'Expertos sobre o Cambeo Climatico, achiquir de tot as emisions de gases d'efecto ibernadero, igual como lo CO2, que calientan periglosamén o clima terrestre.

2. Debán d'a urchenzia en resolber o problema Ecolochistas en Aizión considera que en a baralla contra o calentamiento global d'o clima han de primar-se soluzions más sencillas y seguras, como l'aumento d'a efizenzia enerchetica y l'estalbio, fren a soluzions tecnicas que tardarán añadas en contrimostrar si son fesables u no pas y que no son exentas de risques.

3. A introduczión de grans cantidaz de CO2 en o subsulero terrestre implica prener nuebos risques tecnolochicos, que se adibirían a os muitos que ya patimos, y amuestra prous paralelismos con o problema d'os repuis nucleyars.

4. Ye platero que a promozión d'ista mena de soluzions faborexe a las grans interpresas enercheticas, que han como ochetibo final y unico l'esquimen economico. A luita contra o cambeo climatico, problema an que ellas tanto han contribuyiu a causar, no les afecta que en a mida d'as güegas que puedan tener en o suyo negocio. T'amostrar intrés reyal en a luita contra o cambeo climatico combidamos a interpresas como ENDESA, embrecada, seguntes a prensa, en l'asunto de l'enterreco de CO2, a contrimostar o suyo compromis con o cambeo climatico anulando o suyo prochecto de construczión d'una zentral termica en Fayón, por ixemplo, zentral que ella solenca emitiría dos millons, si fa u no fa, de toneladas de CO2 por año.

5. Consideramos que l'actitut d'o Ministerio d'Industria y d'o Gubierno d'Aragón ye ambigua en o suyo compromis en a luita contra o cambio climatico. Fueras de declarazions alto u baxo enreligadas contra o cambeo climatico, os organismos embrecaus abrían d'empezipiar por fer muestras reyals d'o suyo compromis con feitos de buen fer, como esplanicar publicamén que no se ban a autorizar mas zentrals termicas asabelo de contamináns, igual como as prochectadas en Mequinenza y Fayón. D'estar autorizadas ixas zentrals se contrimostaría de raso que o compromís d'os nuestros gobernans no ye que parolería bueda que nomás busca que cudiar as apariencias.

Asínas, en 2006 se detectoron dos onsas con dos críetas en os mons de Vega de Liébana, Pesaguero y Chirmandat de Campoo de Suso, y en 2007 una onsa con o suyo osezno en os mons de Pesaguero y Polaciones. En l´autualidat, ista poblazión oriental cuenta con un zenso aproximau de 30 onsos.

Por a suya parti, a población ozidental, que se troba entre l'oziden d'Asturias y en l'Alto Sil leonés, acaza alto u baxo 100 exemplars y se mantiene una tendenzia crecien en os zaguers años.

Antimás, en o bienio 2006-2007 s'han trobau 440 indicios "inequívocos" de presencia de onsos en Cantabria, zifra que triplica la obtenida a l'escomenzipie d'a decada, con 132 en o 2000-2001.

Istos datos meten de manifiesto, segúntes o presiden d'a Fundazión Onso Pardo, que s'ha aturau o prozeso de regresión en toda la cordillera y cada begada ye más frecuen a presenzia d´iste animal en a zona oriental, an se troba más menazau.

Ista buena ebolución ye debida, seguntes dizio, a l'amilloramiento d'o suyo afincamiento y l'apoyo sozial enta os onsos, que son "mui bien toleraus" por os bezins d'as redoladas por as que transitan.

Achens d'a Polizia Local y d'o Seprona d'a Guardia Zebil s'han desplazau güe de maitins dica o puesto ta prebar de remolcar dica o puerto lo cuerpo d'a ballena, que mide entre seis y siete metros de largo y se troba en enantau estau de descomposizion, por o que podría fer bels diyas u semanas de l'inte d'a suya muerte.

O consistorio de Platja d'Aro s'ha meso en contauto con o Zentro de Recuperazión d'Animals Marinos de Cataluña (CRAM) ta que os albeitars prenan una muestra d´os restos d´o zetazeo ta fer-le una necropsia que pueda determinar o suyo lugar d´orichen y a causa d´a muerte.
No ye l'unico caso d'ista mena iste mes, o diya 6 un atro zetazeo morió en as costas de Marbella tras colisionar con unas rocas. Os albeitars, aduyaus por bels boluntarios y por un remolcador que prebaba d'ebitar a muerte por asfixia d´o zetazeo, d'a espezie balaenoptera physalus (rorcual común), no podión fer cosa por a suya bida.

"Imos a dictar una lai que enante en a protezión indefinida d´os zetázeos en Chile", dizio tras reunir-se con Gustavo Vergara, boluntario chileno que remanió tres meses a bordo d´un barco de Greenpeace encorrindo a la flota ballenera xaponesa desplegada en auguas d´a Antártida.

"Él representa o clamor que tot lo mundo ye fendo ta ebitar a captura d´istos zetázeos por parti de Xapón", aseguró Uriarte.

Adibió que o Gubierno ye "treballando en esferens alternatibas que amparen encara más ista prohibición legal de captura de zetázeos de traza de buscar atras formulas de protezión, no sólo que d´as ballenas, sino tamién d´os puestos an ellas se troban; an acubillan y an minchan".

Antimas, a ministra esplanicó que a norma chilena bichen de protezión a las ballenas nomas se extiende que dica l´año 2025.

Chile acullira en chunio d´iste año la sisantena trobada d´a Comisión Ballenera Internazional (CBI).

Sabado 19 de chinero
Ecolochistas en Aizión ha parau t'o benién sabado 19 de chinero una rufierta en o Palazio Montcada de Fraga arredol d'o prochecto de Gran Scala en Os Monegros, aintro d'as Chornadas Culturals que leban por títol “Monegros is not Las Vegas”. A colla ecolochista ha clamau a la rufierta “O nuestro futuro en chuego” y lo incluye aintro de dibersos prochectos ta un desembolique sostenible.

IPCENA, Ecologistas en Acción, Monegros no se vende, SEO/Bird Life, Plataforma de Docentes de Aragón y CNT Fraga son as collas que partiziparán en a rufierta, que se mirarán de fer conoxer as enrestidas a o meyo ambién que probocará Gran Scala.

Ecolochistas en Aizión en fazió alcorzanda ayer d'o triste cabo d'año d'a disparixión d'o zaguer echemplar de bucardo, un 5 de chinero de l'añada 2000, ta trucar o ficazió sobre "o poquet grau de desembolique d'o Catalogo d'Espezies Menazadas d'Aragón, endrezau ta pribar nuebas acotoladuras d'espezies silbestres".

A mala suerte fazió que a zaguera fembra de bucardo, de doze añadas d'edat, morise esclafada por a cayida d'un árbol en o parque d'Ordesa. Encara que una añada antis, a colla que treballaba en o "Parque Nacional de Ordesa y Monte Perdido" en o rebiscole d'o bucardo, bi prenesen a iste zaguer echemplar bibo y le quitasen material chenetico por si en un futuro podise clonar-se a espezie.

Con metodos similars a os desembolicaus ta fer a güella Dolly, en l'añada 2003 naxió, por zesárea, a primera crieta clonada d'ista craba pirinenca. Una fembra prematura, cheneticamén igual como a suya predezesora, que morió por problemas respiratorios. Pero lo prochecto s'abandonó de tot por manca de finanziazión en o 2004.

En iste contexto, Ecolochistas en Aizión criticó ayer en un comunicau "a gran cantidat d'espezies menazadas que no cuentan nian con plans de rebiscole u conserbazión". Como dato numerico, bi adibió que d'as 229 espezies replegadas en as esferens figuras d'o Catalogo d'Espezies Menazadas d'Aragón", nomás que güeito cuentan con plans aprobaus, "menos d'o 4%", bi adiben.

O primer catalogo aragonés s'aprobó en 1995 y, en istas añadas, "se constata que os responsables politicos de Meyo Ambién d'o Gubierno d'Aragón no han preniu prou interés". D'as 65 espezies más menazadas en Aragón, no cuentan con un plan que "a crujiente, Borderea chouardii y zapatito dama, dentre a flora; y margaritífera, candrexo común, crebagüesos y esparbero, dentre a fauna".

A soziedat publica Expoagua contará a la fin como boluntarios con menos d'un terzio d'os 34.061 inscribius. Iban a fer un echerzito zebil de 15.000 personas, pero o re-estudio d'as nezesidaz y as propias dificultaz han lebau a achiquir enta 10.000 o numero de colaboradors efectibos d'a Expo.

Os politicos y os propios responsables d'a muestra eban repetiu terne que terne l'ampla cantidat de boluntarios, que meteban como echemplo d'a embrecadura sozial en o prochecto. Pero agora, cuan manca menos de meya añada ta la enguerada, s'ha correchiu a la baxa. A responsable d'Atenzión a o Boluntariau, Carmen Campos, sacó importanzia a iste feito y subrayó que tot se debe a o plan d'operazions que fixa as fainas a reyalizar y os puestos a abondar. "Emos bisto que con iste numero de boluntarios, bella cosa más de 10.000, s'abonda tot sin problemas".

A reduczión d'efectibos quedó contimostrada con a combocatoria d'o concurso d'amanidura d'os uniformes, o pasau berano, a penar de que a organizazión continaba charrando de 15.000 colaboradors ofizials. Con tot y con ixo, Expoagua yera encargando un maximo de 12.000 equipazions ta bestir a o personal y atender reposizions.

Fuens amanadas ta la muestra siñalón que bi ha dificultaz ta lograr o numero inizial de boluntarios efectibos y que, de feito, os que bi'n abrá a la fin tendrán más carga de treballo d'a prebista ta suplir a "baxa" de 5.000 personas. "Bi ha muitos simpatizáns, pero no tantos que sigan disposaus a embrecar-se reyalmén t'o benién berano a colaborar en a causa dando o suyo tiempo", explicón.

A opinión ofizial ye esferén de tot. Carmen Campos subrayó que a reduczión de personal s'ha debiu a un chiro d'as necezidaz, motibada por a disponibilidat d'un plan d'operazións muito definiu.

A suya faina, que no pas estará bosada, estará complementaria a la d'a plantilla d'Expoagua y se desembolicará mientres un minimo de seis oras a o diya.

En os tiempos que corren ta bels colectibos sozials, l'aplicazión estrita d'a lei amanix como un feito tan edificán igual como extraordinario. Por ixo, cuan o 5 d'abiento o Tribunal Supremo fazió publica una sentenzia que declara prescrita la condena d'os responsables d'o bistero sabotache d'a presa nabarra d'Itoiz, a colla ecolochista Solidarios con Itoiz lo zelebró con a uforia d'as bictorias inasperadas. Ixe mesmo diya, Julio Villanueva, que cumpliba condena en a garchola d'Iruña-Pamplona por ixos feitos, retornaba automaticamén a libertat, y zinco d'os suyos compañers o dreito a fer una gambadeta por a carrera sin medrana a estar aturaus, dimpués de güeito añadas de bida en clandestinidat.

O 6 d'abril de 1996, güeito miembros de Solidarios con Itoiz echecutón una aizión que fería trascender a luita contra l'entibo dillá d'as güegas de l'Estau español. Ixe diya, armaus de sierras radials, tallón os cables que transportaban o formigón ta la construczión d'o monumental malacón. Ta ixo, retenión mientres zinco minutos a uno d'os guardas que cusiraban as obras. Dimpues d'o sabotache, que obligó a aturar mientres meses os treballos, os güeito ecolochistas s'entregón ta la Guardia Zivil. Tres añadas dimpués, en un chuizio que o mobimiento ecolochista calificó de “echemplarizán”, estión condenaus a cuatro añadas y diez meses de garchola por daños y ature ilegal (secuestro).

Dende allora, s'enzetó un autentico calbario t'os güeito chobens, que eslixión bislayar o suyo ingreso en prisión y bibir en clandestinidat. En 2001 Iñaki García Koch estió aturau por a Guardia Civil en un control de carretera y tres añadas dimpués suzediba o mesmo con Ibai Guerra. Ambos cumplión toda la condena, permenando antimás as consecuenzias d'o rechimen FIES (Ficheros de Internos de Especial Seguimiento). Villanueva estió o terzer en cayer, y lo fazió lo pasau 17 d'agosto, cuan se disposaba a esbiellar o suyo carnet d'adugar.

Fa dos añadas, Solidarios con Itoiz demandó a prescripzión d'a condena dau que as penas menors de zinco añadas de garchola pueden quedar inabilitadas transcorrius zinco añadas dende a sentenzia. Ta pribar que os ecolochistas continasen creyando “alarma sozial”, l'Audienzia Probinzial de Nabarra denegó a demanda a l'aplicar a prescripzión sobre o delito, no pas sobre a pena. L'“auture ilegal” ye penau con condenas de cuatro a seis añadas de garchola, por o que, indica l'Audienzia, no puede prescribir dica pasaus diez añadas. Agora o Supremo ha sacau a razón a o tribunal autonomico.

Biolochía
A bida d´ista espezie se situga arredol d´os cantaders, isto ye, zonas an que los masclos se troban en primabera ta conquerir a las fembras, emitindo un biello soniu relacionau con l¨ “Uro” u toro europeyo, que le da o nombre d´urogallo. Astí esferens masclos barallan por copular con as fembras a trabiés d´o suyo canto y de barallas ardiens, an que as fembras serán finalmen as encargadas de elexir. Ocupan bosques de frondosas en a Cordillera Cantábrica y de coníferas en os Pireneus (abetosas y pinars de nasarro).

Arredol d´istos cantaders se situgan cheneralmen as árias de cría. Tras as cópulas, son as fembras as encargadas d´a resta d´as tareas reproductoras (incubación y alimentación y cuidau d´os fillesnos), istos zaguers son nidífugos, isto ye, en eclosionar d´o güego tienen capazidat de desplazamiento y de búsqueda de birolla, acompañando a la fembra durante bellas semanas dica la suya independenzia.

D'ibierno los urogallos d´as zonas más fredas reduzen o suyo metabolismo a o mínimo consumo posible, mantenindo los mesmos posaders en os árbols al estar o suyo afincamiento cheneralmen pleno de nieu, astí mincharán fuellas de pino y no guaire mas, en ista época son muy bulnerables a las molestias umans.

Distribuzión en a peninsula iberica
Esisten dos subespezies en a peninsula iberica, a Cantabrica ubicada en a cordillera Cantábrica y a Pirenenca, distribuita por ambas bertiens d´ista cordillera. En a cordillera Cantábrica se creye que bi ha de 500 a 600 exemplars.
En os Pireneus se troba en o mazizo zentro-oczidental y ha sufriu una regresión cheneralizada reflexada en o numero de masclos adultos en 1989 y 2001: Nabarra, 15 y 3, Aragón, 154 y 100, y Cataluña, 773 y 586, lo que supone una población de 689 masclos adultos, cuan fa 12-15 años yera de 942 masclos.

O nucleo oczidental, Chazetania y Nabarra, ye mui chicot y ye isolau. Bi ha bel nucleo importan estable pero garra en crexedura. Bels nucleos d´o Pireneu catalán (Pallars, más que más) agrupan zientos de exemplars maduros, pero dau o suyo baxo ecsito reproductor a tendenzia s´augura mui negatiba.

Amenazas

• A crebadura d´o suyo espazio ye a mayor amenaza pues os cantaders amans a os bordes d´a distribuczión y os d´os bosques chicoz presentan una mayor probabilidat de disaparizión, fendo crecer o periglo de depredazión, fundamentalmen por chabalís y rabosas.
• As estazions d´esquí alpino y de fondo, son a mayor amenaza d´a subespezie pirinenca debiu a la ocupazión y cazegadura de tranquilidat en l´ibierno, cuan a espezie amenista reyalizar o minimo coste enerchetico, sin estar espantada d´os suyos posaders abituals.
• A caza fraudulenca encara contina presen en bels nucleos. Encara que ye un fenomeno de esfizil ebaluazión.

Os colectibos "Amigos de la Tierra, Coagret, Ekologistak Martxan, Greenpeace, Gurelur, Lurra, Asamblea de Vecin@s Amenazad@s por Itoitz, Coordinadora de Itoiz, Iniciativa Ciudadana Yesa No Vida Sí, Nueva Cultura del Agua de Navarra y Solidari@s con Itoitz", han presentau o documento en rueda de prensa en Iruñea.

O texto remera a oposizión que o prochecto ha teniu dende o suyo empezipie en bels colectibos ecolochistas, as percusions que ha teniu o suyo plenau (con más de 1.300 seísmos dende chinero de 2004) y a "inzertidumbre" d'os bezins d'a redolada, igual como os de Zangoza, amán de l'entibo de Yesa, cuala recrexedura ye previsto.

Debán d'isto adiben en o suyo manifiesto l'ature iste pasau berano de Julio Villanueva, uno d'os actibistas de Solidari@s con Itoitz que fa onze añadas tallón os cables que transportaban formigón ta la construczión d'a presa, y que agora cumple una pena "inchusta y esmesurada de tot" porque o sabotache "tenío puesto en un contexto de desamparo y impotenzia".

Esfienden os siñáns que en ixa aczión os actibistas de Solidari@s con Itoitz " i actuón mobius por intreses colectibos como a esfensa y proteczión d'o meyo ambien" y que a suya remanenzia en libertat "no fa garra alarma sozial", por o que consideran que a suya "echemplar condena no tendría atra fin que a de disuadir y fer miedo a la disidenzia".

De todas trazas, advierten d'os "risques d'esferra irreparable" que a suyo parixer contina tenendo l'entibo por a "contrimostrada baquiabilidat d'a ripa cucha" y os "continos mobimientos sismicos".

Semana contra la id-itoiz-ación

Por a suya parti, han anunziau o desembolique d'a "semana contra la id-itoiz-aci-ón" en Iruñea. Se ferá d'o 17 t'o 22 d'abiento en Zabaldi (Iruñea). Dentre atras actibidaz se i ferán charradas y procheczions de bideo. Atamás, o zaguer diya, o sabado 22 os astí congreus podrán partizipar en a kalejira parada dende a Plaza de Nabarrería dica a garchola ta demandar a libertat de Julio Villanueva.